Hafatr'i Mme Fara Rakotoharintsifa noho ny fetin'ny Reny
Amin’izao fetin’ny reny izao dia fifaliana ho ahy ny miresaka amin’ireo rahavavy reny rehetra; na eo amin’ny sehatry ny fiangonana na eran-tany; ary miarahaba azy ireo koa amin’izao fankalazana ny Fetin’ny reny izao.
Mametraka hatrany koa ny anjara toerana voajanahary napetrak’Andriamanitra ho antsika reny, dia ny hitaiza ny ankohonana sy ireo rehetra manodidina antsika napetrak’Andriamanitra ho karakaraina : mety ho eo amin’ny lafiny fampianarana izany, mety talenta voajanahary tahaka ny hira, mety ho lafiny ara-panahy tahaka ny fampianarana tenin’Andriamanitra izany, na fambolena sy fiompina na eo amin’ny toe-karena.
Mànana anjara lehibe isika reny ary tsy hoe amin’ny maha-vehivavy fotsiny izay manana hafanam-po, fa indrindra amin’izany hoe fampitàna sy fampatsiarovana mandrakariva ny andraikitra izay tànan’ny tsirairay izany. Ary izany no adidin’ny reny izay heveriko fa andraikitra lehibe nomen’Andriamanitra antsika; dia ny mampatsiahy ny taranaka fa nomena andraikitra izy eo amin’ny sehatra misy azy tsirairay avy.
