Noely fitoviana
Na aiza na aiza tany onenan’olombelona
Dia tsaroana ho faly sy tonga velombelona
Manan-kery vao sy aina tafaverina
Rehefa ny Noely no indro mitsingerina
Ny tany tia masoandro toa mainka mibaliaka
Mamelam-boninkazo ravo sy sariaka…
Ny Mponina ao, jereo, na hoe sahirankirana
Rehefa injay Noely, dia faly sady mirana.
Ny tanin’ny hatsiaka, indreny fa miravaka
Vaingan-dranomandry, fotsy sy miavaka…
Toa fon’ny mponina any, faly fa voadio.
Noelim-pamonjena mantsy io andro io.
Na fotsy, na ny mainty, na ‘reo mihodi-bola
Na ireo mpanefoefo, na ireo tsy manam-bola
Rehefa ny Noely no tonga am-baravarana:
Samy mahatsiaro ho heni-kasambarana.
Izany no milaza f’Ilay Andriamanitra
Rehefa manome ny fifalian’ny lanitra:
Tsy mamariparitra, na manisy fetra,
Fa mampitovy lanja ny olona rehetra.
Rado (in: Fihavanantsika Lah 2 p. 368, 25 Desambra 1971)
